'സ്മൃതിയും പലാഷും ഒരുപോലെ വേദനിക്കുന്നുണ്ട്, വിവാഹം ഉടനുണ്ടാകും'; വിവാദങ്ങള്‍ക്കിടെ പലാഷിന്റെ അമ്മ

ഇന്ത്യന്‍ വനിതാ താരം സ്മൃതി മന്ദാനയുടെ വിവാഹവുമായി ബന്ധപ്പെട്ട വിവാദങ്ങള്‍ക്കിടെ പ്രതികരണവുമായി വരന്‍ പലാഷ് മുച്ചലിന്റെ അമ്മ. നിലവിലെ സാഹചര്യം സ്മൃതിയെയും പലാഷിനെയും ഒരുപോലെ വേദനിപ്പിച്ചിട്ടുണ്ടെന്ന് ഹിന്ദുസ്ഥാന്‍ ടൈംസുമായുള്ള അഭിമുഖത്തില്‍ പലാഷിന്റെ അമ്മ അമിത മുച്ചല്‍ പറഞ്ഞു. വിവാഹം ഉടനെ തന്നെ നടക്കുമെന്നും അമിത വ്യക്തമാക്കി.

'സ്മൃതിയും പലാഷും ഒരുപോലെ വേദനിക്കുന്നുണ്ട്. തന്റെ വധുവിനൊപ്പം വീട്ടിലേക്ക് വരുന്നത് പലാഷ് ഒരുപാട് സ്വപ്‌നം കണ്ടതാണ്. സ്മൃതിയെ നന്നായി വരവേല്‍ക്കാന്‍ ഞാനും തയ്യാറായിരുന്നു. എല്ലാം ശരിയാവും. വിവാഹവും പെട്ടെന്ന് നടക്കും', പലാഷിന്റെ അമ്മ പറഞ്ഞു.

നവംബർ 23ന് മഹാരാഷ്ട്രയിലെ സാംഗ്ലിയിലായിരുന്നു സ്മൃതിയും സംഗീത സംവിധായകന്‍ പലാഷ് മുച്ചലുമായുള്ള വിവാഹം നടക്കേണ്ടിയിരുന്നത്. എന്നാല്‍ വിവാഹദിനം സ്മൃതിയുടെ അച്ഛന്‍ ശ്രീനിവാസ് മന്ദാനയെ ഹൃദായാഘാതത്തെ തുടര്‍ന്ന് ആശുപത്രിയില്‍ പ്രവേശിപ്പിച്ചതോടെ വിവാഹം മാറ്റിവെക്കുകയായിരുന്നു. ദേഹാസ്വാസ്ഥ്യം അനുഭവപ്പെട്ടയുടന്‍ ആശുപത്രിയില്‍ പ്രവേശിപ്പിച്ച ശ്രീനിവാസിന് ഹൃദയാഘാതമുണ്ടായെന്ന് സ്ഥിരീകരിച്ചിരുന്നു. കല്യാണ തയ്യാറെടുപ്പുകളെ തുടർന്നുണ്ടായ മാനസികസമ്മർദ്ദമാവാം ഹൃദയാഘാതത്തിന് കാരണമെന്ന് സാംഗ്ലിയിലെ സർവ്ഹിത് ആശുപത്രി ഡയറക്ടർ ഡോക്ടർ നമൻ ഷാ വ്യക്തമാക്കുകയും ചെയ്തു. ആന്‍ജിയോപ്ലാസ്റ്റിക്ക് വിധേയനായ ശ്രീനിവാസിന്‍റെ ആരോഗ്യനില തൃപ്തികരമായതിന് പിന്നാലെ ആശുപത്രി വിടുകയും ചെയ്തിരുന്നു.

ശ്രീനിവാസ് മന്ദാന ആശുപത്രിയിലായിരിക്കെ പലാഷ് മുച്ചലിനെയും ആശുപത്രിയിൽ പ്രവേശിപ്പിക്കുകയുണ്ടായി. ഇൻഫക്ഷനെ തുടർന്ന് ആശുപത്രിയിൽ പ്രവേശിപ്പിച്ച പലാഷിനെ പിന്നീട് ഡിസ്ചാർജ് ചെയ്തു. ഇതിന് പിന്നാലെ നിരവധി അഭ്യൂഹങ്ങളും പ്രചരിച്ചുതുടങ്ങിയിരിക്കുകയാണ്. സ്മൃതി മന്ദാനയുടെ വിവാഹം നിര്‍ത്തിവെക്കാന്‍ കാരണം വരന്‍ പലാഷ് മുച്ചലിന്റെ മറ്റൊരു പ്രണയബന്ധമാണെന്നാണ് സോഷ്യല്‍ മീഡിയയില്‍ ഉയരുന്ന ആരോപണം. മേരി ഡി കോസ്റ്റ എന്ന ഇന്‍സ്റ്റഗ്രാം ഐഡി പുറത്തുവിട്ടെന്ന പേരില്‍ സോഷ്യല്‍ മീഡിയ പ്ലാറ്റ്‌ഫോമുകളില്‍ പലാഷിന്റെ ചാറ്റുകള്‍ പ്രചരിക്കുന്നുണ്ട്. എന്നാല്‍ ഇതിന്റെ സത്യാവസ്ഥ എന്താണെന്ന് വ്യക്തമല്ല. ഇതിനിടെ പലാഷുമായുള്ള വിവാഹത്തോട് അനുബന്ധിച്ചുള്ള എല്ലാ പോസ്റ്റുകളും ഇന്‍സ്റ്റഗ്രാമില്‍ നിന്ന് സ്മൃതി മന്ദാന ഡിലീറ്റ് ചെയ്തതും അഭ്യൂഹങ്ങള്‍ക്ക് ശക്തികൂട്ടിയിട്ടുണ്ട്.

Content Highlights: Palash Muchhal’s mother gives major update on his wedding with Smriti Mandhana